સમય ક્રાંતિ ન્યૂઝ..
સુરતમાં કોંગ્રેસના ઉમેદવાર નિલેશ કુંભાણીનું ફોર્મ રદ કરવામાં આવ્યું છે. સુરતમાં હાઇવોલ્ટેજ ડ્રામા બાદ નિલેશ કુંભાણીનું ફોર્મ રદ્દ કરવામાં આવ્યું છે. ડમી ઉમેદવાર સુરેશ પડસાળાનું પણ ફોર્મ રદ કરવામાં આવ્યું છે. સુરતમાં કોંગ્રેસનો હવે લોકસભા ચૂંટણીમાં કોઇ ઉમેદવાર નથી.
લોકપ્રતિનિધિત્વ અધિનિયમ-1951ની કલમ-36(2)(ગ)ની જોગવાઇ મુજબ લોકસભા સામાન્ય ચૂંટણી-2024 અંતર્ગત 24-સુરત સંસદીય મતદાર વિભાગમાં રજૂ થયેલ નિલેશ કુંભાણીનું ફોર્મ અમાન્ય કરવા હુકમ કર્યો હતો.
હાઇકોર્ટમાં જશે કોંગ્રેસ
કોંગ્રેસ લીગલ સેલના સભ્ય ઇકબાલ શેખે કહ્યુ કે, જો કોંગ્રેસના ઉમેદવારનું ફોર્મ રદ કરવામાં આવશે તો ગુજરાત હાઇકોર્ટમાં જવાની તૈયારી છે. જો ફોર્મ રદ કરવામાં આવશે તો આર્ટિકલ 226 રિટ પિટિશન અરજી હાઇકોર્ટમાં કરવામાં આવશે.
શું હતી ઘટના?
સુરત લોકસભા બેઠકના કોંગ્રેસના ઉમેદવાર અને તેમના ડમી ઉમેદવારની દરખાસ્ત કરનારા ચાર જણાએ ફોર્મ ચકાસણી દરમિયાન મુખ્ય જિલ્લા ચૂંટણી અધિકારી અને ઓબ્ઝર્વરની હાજરીમાં ઓન કેમેરામાં અમે ફોર્મમાં સહી જ કરી નથી. એવી એફીડેવીટ અને નિવેદન આપતા જિલ્લા સેવાસદનમાં હાઇવોલ્ટેજ ડ્રામા સર્જાયો હતો.
કોંગ્રેસના વકીલે કહ્યું કે, જે સોગંદનામુ રજૂ કરવામાં આવ્યો છે તે નોટરી એક જ વકીલ પાસે કરવામાં આવી છે, સહી, સ્ટેમ્પ એક જ જગ્યાએ કરવામાં આવી છે.”
કોંગ્રેસના વકીલ બાબુભાઇ માંગુકિયાએ કહ્યું કે, ચાર ટેકેદારોના અપહરણ થયા છે, એ લોકોનો કોઇ કોન્ટેક્ટ થતો નથી, પોલીસ પણ તપાસમાં સહયોગ કરતી નથી. આ ટેકેદારોની ખાલી સહી જ જોવાની હોય, આ ખોટે ખોટો ઇશ્યૂ ઉભો કરવામાં આવ્યો છે.કાયદા પ્રમાણે સહી જ જોવાની હોય છે, આખે આખી વિગતો જોવાની હોતી નથી.