સમય ક્રાંતિ ન્યૂઝ..
ભારતે સુપર-8ની છેલ્લી મેચમાં ઓસ્ટ્રેલિયાને 24 રને હરાવ્યું છે. ભારતની જીતમાં રોહિત શર્મા, અર્શદીપ સિંહ અને કુલદીપ યાદવે સૌથી મોટો ફાળો આપ્યો હતો. રોહિતે 41 બોલમાં 92 રનની તોફાની ઇનિંગ રમી હતી, જ્યારે કુલદીપ યાદવે મધ્ય ઓવરોમાં આવીને 2 મહત્વની વિકેટ લીધી હતી. તેના સિવાય અર્શદીપ સિંહ ફરી એકવાર ઘણી વિકેટ લેવામાં સફળ રહ્યો હતો. તેણે મેચમાં 3 વિકેટ ઝડપી હતી. પહેલા રમતા ભારતે સ્કોરબોર્ડ પર 205 રન બનાવ્યા હતા. પરંતુ જ્યારે ઓસ્ટ્રેલિયા ટાર્ગેટનો પીછો કરવા મેદાનમાં ઉતર્યું ત્યારે ટ્રેવિસ હેડ એક છેડેથી મક્કમ રહ્યો, પરંતુ બીજા છેડેથી કોઈ બેટ્સમેન લાંબી ઈનિંગ રમી શક્યા નહીં. હેડે 43 બોલમાં 76 રન બનાવ્યા, પરંતુ તે ઓસ્ટ્રેલિયાને જીત તરફ ખેંચી શક્યો નહીં.
જસપ્રિત બુમરાહે ટ્રેવિસ હેડને આઉટ કરીને પાસુ પલટી નાખ્યું
ઓસ્ટ્રેલિયાને છેલ્લી 4 ઓવરમાં જીતવા માટે 58 રનની જરૂર હતી. ટ્રેવિસ હેડ હજુ પણ ક્રિઝ પર હતો અને જોરદાર બેટિંગ કરી રહ્યો હતો. દરમિયાન, જસપ્રીત બુમરાહ 17મી ઓવરમાં બોલિંગ કરવા આવ્યો હતો, જેણે ટ્રેવિસ હેડને રોહિત શર્માના હાથે કેચ કરાવ્યો હતો. હેડની વિકેટ પડી જતાં ભારતીય કેમ્પે રાહતનો શ્વાસ લીધો હશે. બુમરાહની આ ઓવર વધુ ઘાતક સાબિત થઈ કારણ કે તેણે આ ઓવરમાં માત્ર 5 રન આપ્યા હતા.