સમય ક્રાંતિ ન્યૂઝ..
નવસારી લોકસભા બેઠક પરથી ભારતીય જનતા પાર્ટીના ઉમેદવાર સી આર પાટીલ દ્વારા આજે વાજતે ગાજતે વિશાળ રેલીનું આયોજન કરવામાં આવ્યું હતું. મુખ્યમંત્રી ભૂપેન્દ્ર પટેલ અને ગૃહ રાજ્યમંત્રી હર્ષ સંઘવી સહિત હજારોની સંખ્યામાં કાર્યકરો અને શુભેચ્છકો સાથે યોજાયેલી વિશાળ રેલીને પગલે ઠેર – ઠેર પોલીસ દ્વારા ચુસ્ત બંદોબસ્ત ગોઠવવામાં આવ્યો હતો.
કાળઝાળ ગરમી વચ્ચે પણ રેલીમાં જોડાયેલા કાર્યકરો અને શુભેચ્છકોનો ઉત્સાહ સાતમા આસમાને નજરે પડ્યો હતો. વહેલી સવારે સાંસદ સી આર પાટીલ પોતાના નિવાસ સ્થાને પરિવારજનો સાથે પુજા – અર્ચના કર્યા બાદ નવસારી મધ્યસ્થ કાર્યાલય ખાતે જવા માટે રવાના થયા હતા.
લોકસભાની ચુંટણીના પડઘમ વચ્ચે આગામી ૭મી મેના રોજ રાજ્યની તમામ લોકસભા બેઠકો પર મતદાન યોજાનાર છે ત્યારે આજે નવસારીમાં ભાજપના ઉમેદવાર અને પ્રદેશ ભાજપ પ્રમુખ સી આર પાટીલ દ્વારા વિશાળ જનમેદની શક્તિ પ્રદર્શનનું આયોજન કરવામાં આવ્યું હતું. સતત ત્રણ ટર્મથી નવસારીના સાંસદ તરીકે ઐતિહાસિક લીડ સાથે ચુંટાઈ આવતાં લોકપ્રિય સાંસદ સી આર પાટીલ સહિત મુખ્યમંત્રી ભુપેન્દ્ર પટેલ, ગૃહ રાજ્યમંત્રી હર્ષ સંઘવી, ચોર્યાસી ધારાસભ્ય સંદિપ દેસાઈ, ઉધનાના ધારાસભ્ય મનુ પટેલ, લિંબાયતના ધારાસભ્ય સંગીતા પાટીલ અને નવસારીનાં ધારાસભ્યો પણ ઉપસ્થિત રહ્યા હતા. સુરતથી નવસારીમાં ભાજપ કાર્યાલય પહોંચ્યા બાદ વિશાળ રેલીનું આયોજન કરવામાં આવ્યું હતું. જેમાં હજારોની સંખ્યામાં કાર્યકરો – શુભેચ્છકોની સાથે મહિલાઓ પણ ઉપસ્થિત રહી હતી. એક તરફ કાળઝાળ ગરમી હોવા છતાં પણ રેલીમાં ઉમેટેલ જનમેદનીમાં ભારે ઉત્સાહ જોવા મળ્યો હતો. નવસારી અને સુરતથી મોટી સંખ્યામાં જોડાયેલા કાર્યકરો દ્વારા રેલી પૂર્વે જ તડામાર તૈયારીઓ આદરી હતી.
ખાસ કરીને ફુલોથી શણગારવામાં આવેલી ગાડીઓ સહિત મહિલાઓ અને કાર્યકરોએ સાફા પહેરી ગરબે ઝુમતા નજરે પડ્યા હતા. ભારે ઉત્સાહ અને ગગનભેદી નારા સાથે નીકળેલી રેલીમાં ખુલ્લી જીપમાં સીઆર પાટીલ, મુખ્યમંત્રી ભુપેન્દ્ર પટેલ સહિતના આગેવાનો સવાર નજરે પડ્યા હતા. જેઓએ રેલી દરમિયાન જાહેર જનતાનું અભિવાદન ઝીલવાની સાથે નિશ્ચિત વિજયનો વિશ્વાસ વ્યક્ત કર્યો હતો. બપોર બાદ સમ્પન્ન થયેલી રેલી બાદ હવે આવતીકાલે સાંસદ સી આર પાટીલ દ્વારા નવસારીમાં ચુંટણી અધિકારી સમક્ષ ઉમેદવારી પત્રક ભરવામાં આવશે.